Festibal euskalduna eta herritarra
EHZ festibala, musika festibal huts bat baino gehiago da. Auzolanaren
eta militantismoaren bidez, hainbat baloreren inguruan garatu den herri
ekimena da. Hauek dira EHZ festibalaren nortasuna eta izaera biltzen
dituzten ezaugarriak :
Euskal Herrian kokatzen den festibala da. Eta euskal izaera hori zentzu
herritarran ulertzen dugu festibaleko kideek. Herri garapenaren aldeko
iniziatiba da. Horrela, sortzetik hara, Arrosan (Baxe Nafarroa) iragan
zen EHZ. Azken 5 urteetan, Xiberoako Idauze Mendin egin dugu gure 3
eguneko besta.
Logika horretan, lekuko eragileekin lan egiten dugu EHZn. Tokiko
ekoizpenak bultzatzen ditugu gure kontsumoetan, lurraren garapena
segurtatzen dutenak. Adibidez, edari eta janarietan, lekuko
ekoizleengan jotzen dugu, eta Euskal Herriko Laborantza Ganbararekin
igandeko herri bio bazkaria antolatzen dugu iaztik.
Auzolanan oinarritzen den festibala
EHZ 800 bat laguntzaileren lan bolondresari esker aitzina doan
festibala da. Festibalaren 3 egunetan milaka dira lanean ari diren
laguntzaileak. Urtean zehar, festibalaren antolaketa lan talde
desberdinetan bereizten diren borondatezko langileei esker egiten dugu.
Festibal zabala
EHZren helburua, ahalik eta jende gehienari 3 eguneko mikro-gizarte
batean parte hartzeko aukera ematea da. Horretarako, tarifa politika
merkea bultzatzen dugu.
Amalurra eta prebentzioa oinarri
Amalurra zaintzea EHZren lehentasunetariko bat da. Horretarako, festibaleko 3 egunetan hainbat ekimen bultzatzen ditugu :
- Plastiko gogorrezko baso berrerabilgarrien zabalpena: plastika ondakinak %75 murrizten ditu
- Birtziklapenaren orokortzea: birtziklapen politikari esker, iazko festibalean 7.590 kilo ondarkin birtziklatu dira (plastika, kartoina,
papera, etxe ondarkinak...)
Horrez gain, festak berekin dituen arriskuak murrizteko prebentzio kanpainak eramaten ditugu :
- Euskal Herriko hainbat herrietatik, autobusak antolatzen ditugu urririk gazteak festibalera eramateko. Herri hauetatik antolatzen ditugu
autobusak : (Hendaia, Donibane Lohitzune, Baiona, Iruña, Hernani, etab....)
- Festibal garaian, hainbat elkarterekin elkarlanean, sexualitatearen, droga kontsumoen... inguruan sentsibilizazio kanpainak eramaten ditugu
(preserbatibo banaketa, drogen teztak...)
|
EHZ elkartea 
